- 33 -

1317. Dezember 23.

In nomine patris et filij et Spiritus sancti amen. Racio dictat, iura suadent. experiencia edocet, quod humani contractus testibus convenientibus et instrumentis publicis debeant roborari, ut omnis controversia ab eis propulsetur. Proinde nos Nicholaus abbas de Ruda ordinis Cysterciensis notum facimus universis, quod de beneplacito incliti principis domini Lestconis dei gracia ducis Rathyboriensis et permissione visitatorum nostrorum, de consilioque seniorum ac de consensu tocius conventus nostri, quatuor maccella libera in Zar nulla fraude vel violencia interveniente, sed sola necessitate monasterij nos urgente vendidimus illustri domicelle sorori Ofce ordinis beati Dominici aput Rathybor commoranti, que macella iam memorata nulli alteri nec de iure nec de facto debita sed tantum ad nostrum monasterium iure testamenti seu extreme voluntatis pertinencia coram prenominato domino duce Lestcone contulimus tradidimusque, assignavimus ac resignavimus iam dicte sorori Ofce, totumque ius possessionis ac libertatis quod habuimus in pretaxatis macellis sic rite ac legaliter in eius transtulimus potestatem, ut quiete in perpetuum debeat possidere. Nos namque omni prorsus accioni, impeticioni repeticionique ac questioni movende super hiis macellis renunciamus penitus pro nobis et pro nostris successoribus in hiis scriptis. Que macella hij tenent in hoc anno, unum Librich, aliud filius Martini, residua duo tenent Tilo cognomento Heupt et Cunzo de Holkyn: incipientibus autem facere transitum per ea a curia domini ducis sita sunt ad dexteram omnia pariter in medio macellorum. Acta sunt hec in ecclesia sororum Rathyboriensium iam dicti ordinis beati Dominici coram testibus infra scriptis, videlicet magistro Godino canonico capelle domini ducis, et dominis Martino iudice terre Rathyboriensis et domino Nicholao Ceciradi et Pacosio Stoygneui, ac dominis civibus Johanne Macyconis, Osualdo, Wernero, Tytusone. Ad evidenciam vero et munimen predictorum sigillum nostrum duximus presentibus apponendum, Omniaque premissa nomine nostro fecimus publicari in Zar coram advocato et scabinis. Datum aput Rathybor anno domini M°. ccc°. xvij°. kal. Ianuarij x°.
In nomine patris et filij et spiritus sancti amen. Ad obviandum iniurie quam ex animo detestamur, et ad piam instanciam ementis et vendentis nos Lestco dei gracia dux Rathyboriensis admittimus et ratam habemus ac confirmamus empcionem et vendicionem quatuor macellorum liberorum in Zar que soror nostra Ofca a domino Nicholao abbate de Ruda ordinis cysterciensis pro certa pecunia comparavit. Decernimus autem ut dicta macella in pristina et plena remanere debeant libertate, et ne census eorum vilescat ex multiplicacione vel ad alium locum translacione macellorum, sed in suo vigore permaneant iuxta temporum condicionem et profectum civitatis augeri valeant consequendo. Ad evidentem autem confirmacionem premissorum sigillum nostrum de mandato nostro presentibus est appensum. Datum ut supra coram testibus supra scriptis.

Aus dem Archiv der Dominikanerinnen zu Ratibor. Anhangend 1) das grosse Siegel des Herzogs mit Rucksiegel wie N. XXVI. 2) Das kleine elliptische des Abtes; es zeigt eine stehende Figur mit Buch und Stab (Kopf fehlt) und der Umschrift: SIGILLVM. ABBATIS. DE. RVDA. Beide an rothen Seidenfaden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.